140 അക്ഷരങ്ങളിൽ ഒരു കഥാലോകം 

മിനിക്കഥയെന്നാൽ പണ്ട് മനോരമ ആഴ്ചപ്പതിപ്പിൽ നോവലുകൾക്ക് ഇടയിൽ പെട്ടിയിൽ  കൊടുത്തിരുന്ന ഏതാണ്ട് ഒരു പാരഗ്രാഫ് വരുന്ന കഥകളാണ് ഓര്മ്മ വരിക. പിന്നെ തളത്തിൽ ദിനേശൻ വായിച്ചു പൊട്ടിച്ചിരിപ്പിക്കാൻ ശ്രമിച്ച ഫലിത ബിന്ദുക്കളും.

അത് കൊണ്ട് തന്നെ ഓർഗാനിക് ബി പി എസ് ലോക പരിസ്ഥിതി ദിനത്തോട് അനുബന്ധിച്ചു മിനിക്കഥ മത്സരം നടത്തുന്നുവെന്ന് പറഞ്ഞപ്പോൾ കുറഞ്ഞത് ഒരു പാരഗ്രാഫ് എങ്കിലും എഴുതി തകർത്തു  വിടണമെന്ന ആലോചന 140 അക്ഷരങ്ങൾ എന്ന് കേട്ടപ്പോൾ ഒന്ന് മങ്ങിപ്പോയി. തോന്നി എല്ലാത്തിനോടും ഒരു പുജ്ഞം. അക്ഷരങ്ങളേ, അതും 140!!! (ആശ്ചര്യചിഹ്നം). പരിസ്ഥിതി സംരക്ഷണമെന്നല്ല, ഇഹത്തിലും പരത്തിലും ഉള്ള എന്തിനെക്കുറിച്ചും എഴുതാൻ തയ്യാറായി നെഞ്ച് വിരിച്ചു നിന്നവർ എന്നാലൊന്നു കാണട്ടെ എന്ന മട്ടിൽ  നില്ക്കാതെ നട്ടെല്ല് 'റ ' പോലെ വളച്ചു കീഴടങ്ങി എന്ന് മാലോകരെ കൊണ്ട് പറയിപ്പിക്കുവാൻ പാടുവോ. അതുകൊണ്ട് (പതിവുപോലെ) ഗൂഗിളിൽ കയറി ശരണം വിളിച്ചു. എന്റമ്മോ! 140 അക്ഷരക്കഥകളുടെ മഹാപ്രപഞ്ചം. ശിവ ശിവ ശിവനേ. ആദ്യം കയ്യിൽ  തടഞ്ഞു, ഏനെസ്റ്റ് ഹെമിംഗ് വേയുടെ ആ പഴയ കഥ (140 അക്ഷരങ്ങളുടെ നിബന്ധന നമ്മുടെ ട്വിട്ടെര്ന്റെ ഞരമ്പിൽ ഓടുന്നതിനും മുന്പുള്ള കഥ).

'കുഞ്ഞു ഷൂസുകൾ വില്പ്പനക്ക്'. ഒരിക്കലും ധരിക്കത്തവ'.

കുറെ നേരം മനസ്സ് പറന്നു നടന്നു, ഒരു കുഞ്ഞു ഷൂസിന്റെ ലേസിലും തൂങ്ങി. എന്തുപറ്റിയാവോ ആ കുഞ്ഞിന് ? ആവോ. എന്തായാലും കളി കഥയായി. കഥ കാര്യമായി. 140 അക്ഷരങ്ങളിൽ പത്തെഴുന്നൂര് കഥകൾ വിരിഞ്ഞു. അവ പറന്നു പറന്നു ഓർഗാനിക് ബി പി എസ് വെബ്സൈറ്റിൽ ചേക്കേറി. അവയിൽ  നിന്നു  തെരഞ്ഞെടുക്കപ്പെട്ട 30 നല്ല മിനിക്കഥകൾ ഇപ്പോൾ അവിടെയുണ്ട്.

വരൂ, നമുക്കൊന്നിച്ച്‌ കാണാം. വ്യത്യസ്തമായ ഒരു കഥാ ലോകം. പരിസ്ഥിതിയെക്കുറിച്ച് വേപഥു പൂണ്ടവർ, ഞെട്ടിത്തരിച്ചു നിൽക്കുന്നവർ, സമാധാനത്തിന്റെ വെള്ളരി പ്രാവുകളെ പറത്തി  വിടുന്നവർ, ഒരു തൈ നട്ടവർ, മഴുവെറിഞ്ഞു കളഞ്ഞു എനിക്കിനി വരം വേണ്ടാന്ന് പറഞ്ഞ  പുതിയ കാലത്തിന്റെ മരം വെട്ടുകാരൻ, മരം വെട്ടരുതെന്നു എഴുതി വക്കാൻ മരത്തിന്റെ ഒരു ബോർഡ് അന്വേഷിച്ചു നടന്നവൻ, പരിഹാസത്തിന്റെ കുത്തും മുനയും ഒളിപ്പിച്ച കഥകൾ ... 

വായിക്കാം, മനസ്സ് തൊട്ട  കഥകൾക്ക് വോട്ടു ചെയ്യാം. ആദ്യ മൂന്നു മിടുക്കർ മുപ്പതിനായിരം, പതിനയ്യായിരം, അയ്യായിരം വീതം സമ്മാനം വാങ്ങട്ടെ. ചെറിയ അക്ഷരങ്ങളിൽ  ചിന്തയുടെ വലിയ ലോകം ഒളിപ്പിചവരല്ലേ. അതവർ അർഹിക്കുന്നതല്ലേ!

ജൂണ്‍ 15 വരെ ഓർഗാനിക് ബി പി എസ് വെബ്സൈറ്റ് (www.organicbps.com ) സന്ദർശിക്കൂ. ഇത് പ്രകൃതിക്ക് വേണ്ടി ഒരുക്കിയ ചിന്താപൂർണമായ ഒരു മത്സരം തന്നെയാണ്. ഇതിലെ കഥകളിലെ  പ്രതിഭയുടെ മിന്നലാട്ടം നമ്മെ അതിശയിപ്പിക്കുക തന്നെ ചെയ്യും! www.organicbps.com